शनिबार, वैशाख २२, २०८१

बैतडीमा चाडपर्वकै अवसर पारि क्रिकेट प्रतियोगिता आयोजना

मेरोन्यूज २०८० कार्तिक २ गते १३:१७

बैतडी । नेपालीहको मुख्य चाड दसैँ र तिहारको अवसरमा बैतडी जिल्ला क्रिकेटमय बनेको छ । दसैँ र तिहारको अवसर पारेर बैतडीमा चारवटा क्रिकेट प्रतियोगिता आयोजना गरिँदै छ ।

Advertisement

आजदेखि दोस्रो संस्करणको वाशुलिङ प्रिमियर लिग (बिपीएल( सुरु भएको छ भने यही कात्तिक १० गतेदेखि पाटन प्रिमियर लिग (पिपिएल) को तेस्रो संस्करण, १५ गतेदेखि दशरथचन्द नगरपालिकामा नगरस्तरीय क्रिकेट र आगामी मङ्सिरमा बिडिसिए कप क्रिकेट प्रतियोगिता आयोजना गरिने भएको छ ।

बाशुलिङ क्रिकेट क्लबको आयोजनामा हुने .(बिपीएल ) सिजन टु का खेल सिद्धखाली खेलमैदान सतबाँझमा भइरहेका छन् । प्रतियोगितामा १४ टोलीको सहभागिता रहेको क्लव का प्रतिनिधि नवराज ऐरीले जानकारी दिए । प्रथम हुने टोलीलाई रु ३५ हजार र दोस्रो हुने टोलीललाई रु १८ हजार पुरस्कारसहित पदक र प्रमाणपत्र प्रदान गरिने छ ।

यसैगरी साथै पाटन क्रिकेट क्लबको आयोजनामा हुने पिपिएल–३ का खेलहरू श्रीकृष्ण माविको खेलमैदानमा सञ्चालन हुनेछन् । उक्त प्रतियोगिताका लागि पनि १८ टोली सहभागी हुने भएका छन् ।

विजेता टोलीले रु एक लाख ११ हजार एक सय ११ र दोस्रो हुनेले रु ५५ हजार पाँच सय ५५ पाउने क्लबका अध्यक्ष किरन चन्दले जानकारी दिए ।

यस्तै दशरथचन्द नगरपालिकास्तरीय क्रिकेट प्रतियोगिता यही कात्तिक १५ गतेदेखि सुरु हुने भएको छ । नगर खेलकुद विकास समितिले जारी गरेको सूचनामा कात्तिक २३ गतेसम्म नगरस्तरीय पुरुष क्रिकेट प्रतियोगिता सञ्चालन हुने जनाएको छ ।

बुड्डाबाजे खेलमैदान रातामाटा हुने सो प्रतियोगितामा सहभागी हुने टोलीलाई सहभागिताका लागि प्रत्येक वडा कार्यालयलाई आग्रह गरिएको छ । वडागत टोलीको व्यवस्थापन वडा कार्यालयले गर्ने नगर खेलकुद विकास समितिका अध्यक्ष भूपेन्द्र चन्दले बताए ।

दशरथचन्द नगरपालिकाको पूर्वनिर्धारित खेलकुद कार्यक्रमअनुसार क्रिकेट प्रतियोगिता आयोजना गर्ने तयारी भएको हो । जिल्ला क्रिकेट सङ्घले मङ्सिर १६ गतेदेखि बिडिसिए कप क्रिकेट प्रतियोगिता आयोजना गरेको छ । सो सङ्घले जिल्लामा रहेका १३ ओटा क्रियाशील क्रिकेट क्लबलाई समेट्दै बिडिसिए कप क्रिकेट प्रतियोगिता आयोजनाको गर्न लागेको सङ्घका अध्यक्ष विनोदबहादुर चन्दले बताए ।

जिल्लाको सहिद दशरथचन्द खेलमैदान सुन्दरखाली र पाटन खेलमैदानमा प्रतियोगिता सञ्चालन हुने बताइएको छ । प्रतियोगितामा भाग लिने टोलीलाई कात्तिक मसान्तभित्र सहभागिताका लागि आग्रह गरिएको छ ।

सहिद दशरथचन्द खेलमैदानमा नागार्जुन क्रिकेट क्लब, कालशैनी क्रिकेट क्लब, त्रिपुरा क्रिकेट क्लब, ग्वाल्लेक क्रिकेट क्लब, प्रतिष्ठान, एनआरवाइसी बठ्ठा र पञ्चकोटी क्रिकेट क्लबहरुबीच खेल हुने छ । त्यसैगरी पाटन खेलमैदानमा निङ्लासैनी क्रिकेट क्लब, नवजागृति क्रिकेट क्लब, महामाया क्रिकेट क्लब, यौंगस्टार क्रिकेट क्लब, महारुद्र क्रिकेट क्लब र पाटन क्रिकेट क्लबबीच खेल हुने आयोजकले जनाएको छ ।

प्रतियोगितासम्बन्धी कार्यविधि र सहभागिता शुल्कका विषयमा अर्को सूचनामार्फत जानकारी गराइने आयोजक सङ्घले जनाएको छ, यस्ता प्रतियोगिताले क्रिकेटको विकास र खेलाडी उत्पादनमा सहयोग पुग्ने सुदूरपश्चिम प्रादेशिक क्रिकेट सङ्घका उपाध्यक्ष रमेश बोहराले बताए । नियमितरूपमा हुने प्रतियोगिताले खेलाडी क्षमता अभिवृद्धि र क्रिकेटको विकासमा टेवा पुग्ने उनको भनाई छ ।

प्रतिक्रिया