मंगलबार, जेठ ८, २०८१

शब्दयात्रा प्रकाशनले सम्मान गर्ने तीन स्रष्टाको नाम सार्वजनिक

मेरोन्यूज २०७८ असार १३ गते १३:५५

काठमाडौँ । शब्दयात्रा प्रकाशनले आख्यानकार गीता केशरी, भाषा व्याकरण संरक्षणकर्मी शरच्चन्द वस्ती र चार वेदलाई नेपालीमा अनुवाद गर्ने अनुवादक तिलकप्रसाद लुइँटेललाई सम्मान गर्ने भएको छ ।

Advertisement

प्रशासनिक क्षेत्रमा लागेर अर्को विधामा महत्वपूर्ण योगदान गर्ने महिलालाई समर्पण गरिने प्रशासनिक महिला प्रतिभा सम्मान २०७८ सालका लागि आख्यानकार केशरी (काठमाडौँ) लाई समर्पण गरिने प्रकाशनका अध्यक्ष हरि मञ्जुश्रीले जानकारी दिए । यो सम्मानको आर्थिक व्यवस्थापन पूर्वसचिव तथा गायिका उर्मिला श्रेष्ठले गरेकी हुन् ।

यसैगरी अघिल्लो वर्ष सञ्चार माध्यमबाट प्रकाशित र प्रसारित लेख रचनामध्ये पाठकमतबाट उत्कृष्ट ठहरिएका स्तम्भकार वा लेखकलाई समर्पण गरिने स्तम्भकार सम्मान २०७८ सालका लागि नेपाली भाषा–व्याकरणको संरक्षण–सम्वद्र्धनमा उल्लेख्य योगदान गरेकोमा शरच्चन्द्र वस्ती (सुनसरी)लाई समर्पण गरिने भएको छ । यस सम्मानको आर्थिक व्यवस्थापन पत्रकार हरिगोपाल प्रधानले गरेका हुन् ।

कुनै पनि विधाबाट राष्ट्रिय जागरणका क्षेत्रमा विशिष्ट योगदान गर्ने व्यक्तित्वलाई समर्पण गरिने राष्ट्रझङ्कार सम्मान २०७८ सालका लागि चारै वेदलाई नेपाली भाषामा अनुवाद गरी प्रकाशन गराएका लुइँटेल (तेह«थुम)लाई समर्पण गरिने भएको छ । यस सम्मानको आर्थिक व्यवस्थापन साहित्यकार कृष्णहरि मैनालीले गरेका छन् । प्रकाशनले अन्वेषक भरत जङ्गम, प्रा.डा. नन्दीश अधिकारी र निर्मला श्रेष्ठलाई सम्मान गर्ने घोषणा एक महिनाअघि गरेको थियो ।

प्रकाशनले प्रत्येक वर्ष नौ जना स्रष्टालाई सम्मान गर्ने गरेकामा बाँकी तीनजनाको नाम पनि छिट्टै सार्वजनिक गरिने जनाइएको छ । छनोट समितिले चयन गरेका व्यक्तित्वलाई नै प्रकाशनले सम्मान समर्पण गर्ने गरेको छ । प्रकाशनद्वारा प्राचार्य लोकेन्द्र ढकालको संयोजकत्वमा गठित सम्मानित व्यक्तित्व चयन समितिले अनलाइन बैठक बसी नाम छनोट गरेर नामावली उपलब्ध गराएका आधारमा घोषणा गरिएको उनले जानकारी दिए ।

उक्त समितिले शब्दयात्रा प्रकाशनबाट २०७८ सालको प्रथम चरणमा समर्पण गर्नुपर्ने नौ विधाका सम्मानबाट सम्मानित व्यक्तित्वमध्ये छ जनाको नाम छनोट गरेको छ । बाँकी तीन जनाको नाम पनि छिट्टै सार्वजनिक गरिने जनाइएको छ । दोस्रो चरणमा पनि नौ गरी प्रकाशनले प्रत्येक वर्ष १८ जनालाई स्रष्टालाई सम्मान गर्ने गरेको छ । सम्मानपत्र र नगद पाँच हजार राशिसहित सम्मानित गरिने जनाइएको छ । रासस

प्रतिक्रिया