बिहीबार, जेठ १७, २०८१

न्यौपानेको इजलासमा भुटानी शरणार्थी प्रकरणका आरोपीको बयान सुरु

मेरोन्यूज २०८० जेठ १२ गते १३:०७

काठमाडौँ । जिल्ला अदालत काठमाडौंमा नक्कली भुटानी शरणार्थी प्रकणका आरोपीहरूको बयान सुरु भएको छ । न्यायाधीश प्रेमप्रसाद न्यौपानेको इजलासमा बयान सुरु भएको हो ।

Advertisement

आरोपितहरूलाई थुनामा पठाउने कि थुनाबाहिर राख्ने भन्ने आदेश गर्नुअघि इजलासको फाँट नं २५ मा बयान लिन थालिएको हो।

अहिले पक्राउ परेकाको बयान सकेर थुनछेक बहस पछि आदेश आउने छ।

पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणसहित ३० जनालाई प्रतिवादी बनाइएको छ। ती मध्ये १६ जना हिरासतमा छन्। बाँकी १४ जना फरार छन्।

रायमाझी र खाँणसहित पूर्वसांसद आङटावा शेर्पा, नेपाल सरकारका सचिव टेकनारायण पाण्डे, गृहमन्त्रीका पूर्वसुरक्षा सल्लाहकार इन्द्रजित राई, खाँणका निजी सचिव नरेन्द्र केसी, टोपबहादुरका छोरा सन्दीप रायमाझी, शरणार्थी नेता टेकनाथ रिजाल, हज समितिका अध्यक्ष शमशेर मिया, सानु भण्डारी, केशव दुलाल, सन्देश शर्मा, टंक गुरुङ, सागर राई, रामशरण केसी र गोबिन्द चौधरी पक्राउ परेका छन्।

बादलका छोरा प्रतिक र इन्द्रजितका छोरा निरजसहित १४ जना फरार छन्।

उनीहरुविरुद्ध ठगी, लिखित किर्ते, राज्यविरुद्धको कसुर र संगठित अपराधमा मुद्दा दायर गरिएको छ। एकीकृत कसुरमा थप सजाय समेत हुनेछ।

यो कसुरमा अदालतले थुनाबाहिर पठाउने आदेश गरे उनीहरुलाई सम्पत्ति सुद्धिकरण र भ्रष्टाचारको कसुरमा पक्राउ गरेर अनुसन्धान सुरु गरिने छ।

प्रतिक्रिया