काठमाडौं । उपप्रधान तथा गृहमन्त्री नारायणकाजी श्रेष्ठले नेपालीलाई नक्कली भुटानी शरणार्थी बनाएर अमेरिका पठाउने भनेर ठगी गर्ने गिरोहको सबै नेक्ससलाई कारबाहीको दायरामा ल्याइने बताएका छन् ।

बिहीबार आफूसँग भेट गर्न सिंहदरवारस्थित मन्त्रालयमै आएका नेकपा एकीकृत समाजवादीका नेता तथा जनवर्गीय संगठनका नेताहरूसँगको छलफलका क्रममा उपप्रधानमन्त्री श्रेष्ठले दोषीलाई कुनै पनि हालतमा नछाड्ने र निर्दोष कुनै पनि हालतमा नफस्ने गरी सरकारले यो प्रकरणको कारवाही प्रक्रियालाई अगाडि बढाएको बताएका छन् ।

‘निर्दोष कुनै पनि हालतमा पर्ने छैनन्, दोषी कुनै पनि हालतमा छुट्ने छैनन्’ श्रेष्ठले भने ।

श्रेष्ठले यो कार्य सामान्य भ्रष्टाचार मात्रै नभएर संगठित अपराध भएको उल्लेख गरे । अझ त्योभन्दा बढी यो राज्यविरुद्धकै अपराध भएको पनि उनको भनाई छ ।

यो भ्रष्टाचार मात्रै होइन माथिदेखि तलसम्म मिलेर चलाइएको संगठित अपराध हो । यो यतिमा मात्रै सीमित नभएर आफ्नो देशका नागरिकलाई अनागरिक बनाउने राज्यविरुद्धकै अपराध हो, उपप्रधानमन्त्री श्रेष्ठले भने, ‘यसका सबै नेक्ससलाई कानुनी कारबाहीको दायरामा ल्याउनेतर्फ हामी अगाडि बढेका छौँ ।’

श्रेष्ठले यो प्रकरणमा आफूलाई कुनै पनि नेताले दबाब नदिएको उल्लेख उल्लेख गर्नुहुँदै दबाब आए त्यसलाई थेगेरै भए पनि अनुसन्धान प्रक्रियालाई निष्कर्षमा पुर्‍याइने दृढता व्यक्त गरे । शरणार्थी प्रकरणमा प्रधानमन्त्री पुष्पकमल दाहाल ुप्रचण्डु बाट आफूले दह्रो साथ र आडभरोसा पाएको उपप्रधानमन्त्री श्रेष्ठको भनाइ छ ।

मलाई अहिलेसम्म शीर्ष नेताले यसलाई नपक्रनुस् उसलाई नपक्रनुस् भनेर दबाब दिनुभएको छैन । दोषी नफसोस् र निर्दोष नउम्कियोस् भन्ने नै उहाँहरूको कुरा छ, श्रेष्ठले अगाडी थपे, ‘प्रधानमन्त्रीको निर्देशन र आडभरोसा छ । दोषीलाई कारबाही गरियोस् निर्दोस नपरुन् भन्ने छ सबैको कुरा ।’

सिंगो देश भ्रष्टाचार र कमिसनले आक्रान्त बनेको उल्लेख गर्नुहुँदै श्रेष्ठले त्यसबाट मुक्त गराइने बताए । प्रहरीलाई निर्धक्क भएर अनुसन्धान अगाडि बढाउन निर्देशन दिएको उनको भनाइ छ । राजनीतिक दबाबको सामना गर्ने म छु, तपाईंहरू पनि अन्य चलखेलमा नलागी अनुसन्धान गर्नुहोला भनेर प्रहरीलाई भनेको छु, श्रेष्ठले भने।

भेटमा नेकपा एसका केन्द्रीय सदस्यहरू, जनवर्गीय संगठनका केन्द्रीय नेताहरूले शरणार्थी प्रकरणमा सरकारले प्रशांसनीय काम गरेको भन्दै बधाइ दिएका थिए । यो अनुसन्धान प्रक्रियामा आफूहरूको पनि समर्थन रहने भन्दै उनीहरुले कुनै पनि दबाबको अगाडि नझुक्न उपप्रधानमन्त्री श्रेष्ठलाई सुझाव दिएका थिए ।

यो कार्यका लागि जति धन्यवाद र बधाइ दिए पनि कम हुने भन्दै उनीहरूले थप हौसला मिलोस् भनेर आफूहरू भेट्न आएको बताएका थिए । नेपाली समाजमा यो राजनीतिक व्यवस्था तथा राजनीतिक नेतृत्वप्रति नै निराशा पैदा भएको बेला सरकारले भ्रष्टाचारविरुद्ध कदम चालेर ऊर्जा दिएको भन्दै यसलाई निष्कर्षमा पुर्‍याउन हिचकिचाउन नहुने नेकपा एसका नेता कार्यकर्ताको भनाइ थियो । यो प्रकरणमा सरकारमाथि निकै दबाब आउनसक्ने आशंका गर्दै उनीहरूले दबाब थेग्न सरकार सक्षम भए त्यो देश र जनताका लागि निकै ठूलो काम हुने बताएका थिए ।

जस्तै दबाब आए पनि त्यसलाई नस्वीकारी अगाडि बढ्न सुझाव दिँदै एसका नेता कार्यकर्ताले आफूहरू सरकारको यो कदमको साथमा रहेको बताए ।

यसअघि मंगलबार पनि कांग्रेसका युवा नेताहरूले भेटेर यो अनुसन्धानलाई निष्कर्षमा पुर्‍याउन र दबाबका अगाडि नझुक्न श्रेष्ठलाई सुझाव दिएका थिए ।