काठमाडौं । सरकारको नेतृत्व गरिरहेको दल नेपाली कांग्रेसको केन्द्रीय समिति बैठक आज बस्दैछ । आगामी संघ प्रदेशको चुनावको रणनीतिका बारेमा छलफल गर्न कांग्रेसको केन्द्रीय समितिको बैठक बस्न लागेको हो । स्थानीय तह निर्वाचनपछि कांग्रेस केन्द्रीय समिति बैठक बस्न लागेको पहिलो पटक हो ।

बैंठक दिउँसो १ बजे बस्नेछ । बैठकमा स्थानीय तह निर्वाचनको समीक्षा हुने र त्यसपछि आगामी प्रदेश र प्रतिनिधिसभा निर्वाचनको रणनीति बनाइने कांग्रेसका प्रवक्ता डा प्रकाशशरण महतले जानकारी दिए ।
उनले भने, ‘साथीहरुले स्थानीय तह निर्वाचनको अनुभवसहित रिपोर्टिङ गर्नुहुन्छ त्यसकै आधारमा भविष्यको बाटो पनि तय गर्छौं ।’

आगामी निर्वाचनमा पनि सत्ता गठबन्धनलाई निरन्तरता दिने आम भावना रहेको बताउँदै महतले त्यसबारे पनि बैठकमा छलफल गर्ने बताए ।

कांग्रेस केन्द्रीय केन्द्रीय कार्यालयका मुख्य सचिव कृष्णप्रसाद पौडेलले स्थानीय तह निर्वाचनको समीक्षा बैठकको मुख्य एजेण्डा रहेको बताए । बैठकमा डा. शेखर कोइराला पक्षले भने सभापति शेरबहादुर देउवाको कार्यशैली र सरकारको कामकारबाहीको विषयलाई प्राथमिकताका साथ उठाउने तयारी गरेको छ ।

आइतबार बसेको कोइराला पक्षका नेताहरुको बैठकले पार्टी नेतृत्व विधानविपरीत चलेको र सरकारमाथि भ्रष्टाचारको आरोप लागेको निष्कर्ष निकाल्दै यही विषय बैठकमा उठाउने निर्णय गरेको थियो । आउने चुनावलाई लक्षित गरेर कोइराला पक्षले भने सभापति समेत रहेका प्रधानमन्त्री शेरवहादुर देउवामाथी दबाब वढाउने रणनीति लिएको छ ।