माओवादी पालिका अधिवेशन
देशभर पालिका सम्मेलन उदघाटन गदै प्रचण्डको पार्टी नेता कार्यकर्तालाई निर्देशन
नेतृत्व सकभर सर्वसम्मत गर्नुस्, नभएपनि जनवादी केन्द्रीयताको लेनिनवादी मान्यता अनुसारको कमिटि फर्मेसन गर्नुस्
काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले एकतावद्ध पार्टी निर्माणका लागि पार्टीका नेता कार्यकर्तालाई सकभर सहमतिमा संगठनका कमिटि निर्माण गर्न आग्रह गरेका छन् ।
माओवादीको शनिबार देशभर शुरु भएको पालिका सम्मेलनलाई एकैपटक सम्बोधन गदै अध्यक्ष प्रचण्डले सकभर सहमति र सहमति नभएपनि जनवादी केन्द्रीयताको लेनिनवादी मान्यताका आधारमा नेतृत्व चयन गर्न निर्देशन गरेका हुन् ।
माओवादीको शनिबार देशभर ७५३ ओटै स्थानीय तहमा पालिका सम्मेलनहरु भइरहेका छन् । त्यसलाई अध्यक्ष प्रचण्डले पार्टीको केन्द्रीय कार्यालयमार्फत भर्चुअल माध्यमवाट एकैपटक विशेष सम्वोधन गरेका हुन् ।
उनले संगठनलाई उत्पादन र श्रमसँग जोडेर लैजान पनि निर्देशन दिए । पार्टीको वैचारिक राजनीतिक कार्यदिशा सही रहेको र कार्यदिशा अनुसार समाजवादी क्रान्तिको तयारीका लागि पार्टी संगठनहरुलाई पनि उत्पादन र श्रमसँग जोडेर लैजानुपर्नेमा प्रचण्डले जोड दिएका हुन् ।
माओवादी केन्द्र अन्य वुर्जुवा पार्टी जस्तो नभएको भन्दै उनले अरु पार्टी भन्दा भिन्न देखाउने र जनतासँग जोडिएर जानका लागि पनि पार्टीको वडादेखि केन्द्र सम्मका संगठनलाई उत्पादन र श्रमसँग जोडेर लैजानुपर्नेमा प्रचण्डले विशेष जोड दिएका हुन् ।
विगतमा पार्टीको हेटौडा महाधिवेशनले पार्टीलाई उत्पादन र श्रमसँग जोडन उत्पादन विग्रेड बनाउने निर्णय गरेपनि त्यसलाई कार्यान्वयनमा लैजान नसकेकोमा कमजोरी भएको स्वीकारदै प्रचण्डले अव भने पार्टीले गल्ती गर्न नहुने बताएका हुन् ।
‘उत्पादन विग्रडलाई दहो सँग समात्न कमजोरी भएकै हो । उत्पादक, श्रम , सहकारी र सामुहिकतासँग जोडेर विकासको मोडेल निर्माण गरेर पार्टीका वडा कमिटि देखि पालिकाहँुदै केन्द्रसम्मले अगाडि जानुपर्छ,’ प्रचण्डले भने, ‘संविधानमा पार्टीले कतिपय विषयमा फरक मत पनि राखेको छ । आवश्यक परे त्यसलाई लिएर भएपनि आन्दोलनमा जाने गरी अव संगठनलाई तयार पारेर जानुपर्छ ।’
जहाँ जहाँ पार्टीको मातहात रहेका स्थानीय सरकार छन्, त्यहाँ पार्टीको नीति कार्यक्रम, सरकारका बजेटहरु, पार्टी संगठन र पार्टीका नीति कार्यक्रम, योजना अभियान र स्थानीय जनताको आवश्यकतालाई समन्वय गरेर विकासलाई नयाँ मोडेलमा विकास गर्न जरुरी रहेको प्रचण्डले बताए ।
समाजवादी अभियानलाई निस्तेज पार्ने राष्टिय अन्तराष्ट्रिय चुनौती अहिले पनि रहेको भन्दै प्रचण्डले त्यसको समाना गर्नका लागि पनि पार्टीलाई एकतावद्ध बनाउने, पार्टी र जनता वीचको सम्वन्ध बनाउने र जनसंगठन, पार्टी र जनताबीचको सम्वन्ध विकास गरेर जानुपर्ने प्रचण्डको भनाई छ ।
उनले युवा र विधार्थीलाई विशेष गरी आवश्यक पर्दा इँटको जवाफ पथ्थ्रले दिने गरी अगाडि बढ्न पनि निर्देशन गरे । ‘जनताको विजयी यात्रामा, वर्गसंर्घषको महाअभियानमा चुनौति यदि कसैले खडा गरिन्छ भने इटको जवाफ पथ्थरले दिने कोशिस गर्नुपर्छ । म युवा विद्यार्थी अझ हरेक क्षेत्रमा रहेका युवाहरुलाई म विशेष अपिल गर्छु ।’– प्रचण्डले भने ।
पार्टीमा १० लाख सदस्य पुग्ने
प्रचण्डले पार्टीमा नयाँ उभार आएको भन्दै पार्टी सदस्य संख्या १० लाख पुग्ने अनुमान गरे । औपचारिक ढंगले सदस्यहरुको झण्डै ८ लाख सदस्यहरु अहिले सफ्टवेयरमा संगठित भइसकेको र अन्य थप दुई लाख नविकरण लगायतका काम गरेर अझै जोडिन वाँकी रहेकोले १० लाख पार्टी सदस्य पुग्ने गरी उभार आएको प्रचण्डको भनाई छ ।
उनले यसलाई पार्टी पूर्नगठनको महाअभियान भएको बताए । ‘यो पार्टी पूर्नगठनको महत्वपूर्ण आयाम हो भन्ने लागेको छ । पार्टीको देशभर वडा सम्मेलन उत्साहका साथ सम्पन्न भएको र त्यही प्रक्रियाको अर्काे कडी पालिका सम्मेलनले प्रदेश सम्मेलनको तयारी र राष्टिय सम्मेलनको तयारीलाई महत्वपूर्ण भूमिका खेल्ने विश्वास लिएको छु ।’
नेकपालाई देशी विदेशी प्रतिक्रियावादीले विभाजित गरेको भन्दै प्रचण्डले राष्ट्रिय आत्मसमर्पणवाद, प्रतिगमनका विरुद्धको संर्घषमा आफूहरु जितेर आएको बताए ।
प्रतिनिधिसभा विघटन गर्ने, नेकपालाई विभाजित गर्ने काममा ओली गुटको मात्र षड्यन्त्र नभएको भन्दै प्रचण्डले ओलीलाई मलजल गर्ने देशभित्रका प्रतिक्रियावादी र देशवाहिरका प्रतिक्रियावादीहरुको मिलोमत्तोको षडयन्त्रको एउटा कडीका रुपमा परिघटना विकसित भएको बताए ।
उनले अहिले माओवादी आन्दोलन र माओवादी नेतृत्वमाथि आक्रमण गर्ने काम भईरहेको पनि बताए । ‘यो हमला माओवादी आन्दोलन माथीको हमला थियो, माओवादी एजेण्डा उल्टाउने, नेतृत्व घेरावन्दी गर्ने षडयन्त्र थियो । त्यसमा नेपाली जनता फेरि विजय भएका छन् ।’– प्रचण्डले भने ।
उनले अब आफू पार्टीको राष्ट्रिय सम्मेलनमा पेश गर्ने राजनीतिक दस्तावेजको तयारीमा रहेको पनि बताए ।
‘हामी समाजवादी क्रान्ति साचो अर्थमा अगाडि वढाउन एउटा क्रान्तिकारी पार्टी आजको राष्ट्रिय अन्तराष्ट्रिय परिस्थिति, उत्पादक शक्ति, सूचना प्रविधिमा भएको विकास र त्यसले मानिसहरुमा ल्याएको मनोविज्ञान सहित अध्ययन गरेर एक्काइसौं शताब्दीको क्रान्तिलाई विकास गर्नुपर्नेछ’ प्रचण्डले भने, ‘अव दस्तावेज तयारीको प्रक्रियामा छु । अन्तराष्ट्रिय परिस्थितिको अध्ययन, हाम्रो आफ्नै इतिहासको अध्ययन काहा राम्रो गरयौं, काहा कमजोरी गरयौं र हामीले अव अवलम्वन गर्नुपर्ने कामको योजना समेटेर दस्तावेज तयार हुन्छ ।’
‘एमालेको महाधिवेशन नभई कुम्भभेला’
माओवादी अध्यक्ष प्रचण्डले एमालेको चितवनमा जारी दशौं महाधिवेशनलाई कुम्भमेलाको संज्ञा दिएका छन् । उनले एमालेको महाधिवेशन नभई कुम्भभेला चलेको र त्यहाँ जनतालाई भ्रम दिने काम मात्र भईरहेको आरोप लगाए ।
‘अरु पार्टीमा विचारलाई कुनै ठाउ छैन । हिजै देखिरहनु भएको छ, त्यहाँ कुम्भमेला जस्तो छ । त्यहा रिटोरि मात्र छ, जनतालाई भ्रम दिने मात्र कुरा छ । तर हामी भिन्न राजनीतिक विचारलाई प्राथमिकता दिन्छौं । अरुका तथाकथित अधिवेशन र हाम्रो विचार संश्लेषण गर्ने विषयमा तुलना गर्ने सकिदैन ।’ प्रचण्डले भने ।
उनले अब पार्टी तत्कालिन गठवन्धन निर्माण गर्ने काममा मात्र नअल्झिने र आफ्नै पार्टी निर्माणमा पनि उत्तिकै सक्रिय भएर लाग्ने पनि वताए ।
‘गठवन्धन बनाउनेमा हाम्रो वढी ध्यान गयो, तर पार्टी बनाउनेमा ध्यान भएन । तत्कालिन काममा मात्र अल्झिने र वैचारिक राजनीतिमा ध्यान दिएनौं, त्यसले केही ह्रास गरेको छ । अरु जस्तै गुट स्वार्थमा जाने खतरा देखियो । त्यसो भयो भने यसको ऐतिहासिक काममा लाग्न सकिदैन ।नयाँ संकल्प सहित अगाडी जानुपर्छ । त्यही संकल्पको प्रक्रियामै हामी नयाँ अभियानमा छौं । ’ प्रचण्डले भने –‘वैचारिक राजनीतिक कार्यदिशामा हामी आधारभूत रुपमा सही भनिरह्यौं, संगठनात्मक अस्तब्यवस्त भएपनि , तर त्यसलाई संगठित गर्ने, ब्यवस्थित बनाउने कुरामा लाग्छौं । संगठनलाई अस्तब्यस्त अव त्यसो हुन दिइने छैन । आफ्नै पार्टी संगठन बलियो बनाउने, जनधार वलियो बनाउने र आफ्नै खुटामा उभिने र हामीलाई माया गर्ने सहीद वेपत्ता, घाइने र जनतासँगको सम्वन्धलाई उच्च महत्व दिनेछौं ।’
प्रतिक्रिया