आइतबार, असोज १०, २०७८

सरकारले आजदेखि राज्यकोषबाट खर्च गर्न नपाउने

मेरोन्यूज २०७८ भदौ ३० गते ६:५२

काठमाडौँ । सरकारले राज्यकोषबाट खर्च गर्न नपाउने भएको छ । विनियोजित विधेयक २०७८ पारित नभएपछि सरकारले बुधबार देखि राज्यकोषबाट खर्च गर्न नपाउने भएको छ ।

Advertisement

प्रतिपक्ष नेकपा एमालेले संसद अवरोध कायमै राख्दा विनियोजन विधेयक पारित हुन नसक्दा सरकारले आजदेखि राज्यकोषबाट खर्च गर्न नपाउने भएको हो । २५ भदौमा बजेट अध्यादेश प्रतिस्थापन विधेयक पेस भएको थियो । तर एमालेको संसद बैठक अवरोधले पारित हुन सकेन । मंगलबार एमालका सांसदको नाराबाजीबीच अर्थमन्त्री जनार्दन शर्माले पेस गरेको विनियोजन विधेयक, ३०७८ स्वीकृत भयो ।

अर्थमन्त्री शर्माले विनियोज विधेयक २०७८ माथि विचार गरियोस् भनी राखेको प्रस्ताव प्रतिनिधि सभाको बैठकले स्वीकृत गरेको थियो । तर एमालेको अवरोधले विनियोजन विधेयक पारित हुन सकेन । विधेयक पारित नभएपछि सरकारले बुधबार देखि राज्यकोषबाट खर्च गर्न नपाउने भएको छ ।

सभामुख अग्निप्रसाद सापकोटाले प्रतिनिधि सभाको बैठक आगामी ४ असोजसम्मका लागि स्थगित गरेका छन् । आगामी ४ असोजसम्म वा विनियोजन विधेयक संसदबाट पारित नहुँदासम्म सरकारले राज्यकोषबाट खर्च गर्न पाउने छैन । विनियोजन विधेयक संसदबाट पारित नहुँदा सरकारको खर्च रोकिएको सम्भवतः यो पहिलो घटना हो ।

एमाले अध्यक्ष केपी शर्मा ओली नेतृत्वको सरकारले अध्यादेशबाट गत जेठ १५ गते चालू आर्थिक वर्षको बजेट ल्याएको थियो । उक्त अध्यादेश ६० दिनभित्र संसदबाट पारित गरिसक्नुपर्ने संवैधानिक व्यवस्था छ । अध्यादेशबाट ल्याएको बजेट गत साउन ४ गते संसद् बैठकमा पेस भएको थियो । संवैधानिक व्यवस्था अनुसार बजेट कार्यान्वयन गर्न बुधबारसम्म विनियोजन विधेयक पारित गरिसक्नु पर्ने थियो ।

प्रतिक्रिया