काठमाडौँ । संखुवासभा जिल्लाको मादी गाउँपालिका १ स्थित बैदमानको घरमा भएको हत्यामा शवहरू छरिएको अवस्थामा भेटिएको छ । सोमबार बिहान अन्दाजी २ बजेतिर भएको घटनामा मारिएकाहरूको शव यत्रतत्र अवस्थामा फेला परेको हो ।

जिल्ला प्रहरी कार्यालयका प्रहरी प्रवक्ता शुभेष अधिकारीका अनुसार ८४ की पार्वती कार्कीको शव घरमा फेला परेको हो, भने तेज बहादुर कार्कीको शव रोडमा फेला परेको हो ।

त्यस्तै, तेज बहादुरकी श्रीमती कमला र बुहारी रञ्जनाको शव खोल्सामा फेला परेको हो । प्रवक्ता अधिकारीले भने, ‘११ वर्षीय दिपेन र ७ वर्षीय गोमाको शव भने घरदेखि १ किलोमिटर टाढाको बारीमा फेला परेको हो ।’

घटनाको प्रकृती हेर्दा लखेटेर यातना दिँदै मारेको हुन सक्ने प्रवक्ता अधिकारीले बताए । उनले घटनास्थलमा रहेका एक प्रहरी अधिकारीलाई उदृत गर्दै भने, ‘शव फरक–फरक क्षेत्रमा भेटिएको हुँदा लखेटेर मारेको हुन सक्ने आंकलन गरेका छौँ, हत्याको शैली क्रुर नै देखिन्छ, यातना दिएर हत्या गरेको जस्तो देखिन्छ ।’

तालिम प्राप्त कुकुरसहित फरेन्सिक विज्ञ जाँदै

घटनाबारे थप अनुसन्धान गर्न प्रहरीले फरेन्सिक विज्ञ र तालिमप्राप्त कुकुरसहितको टोली पठाएको प्रदेश प्रहरी कार्यालय प्रदेश १ का प्रवक्ता प्रहरी उपरिक्षक (एसपी) नविनराज राईले जानकारी दिए ।

एसपी राईका अनुसार घटनाको अनुसन्धानका लागि संघीय प्रहरी इकाई कार्यालयबाट तालिम प्राप्त कुकुर र एसपी भिम दाहालसहितको फरेन्सिक विज्ञको टोली पठाइएको हो ।

तालिम प्राप्त कुकुर र फरेन्सिक विज्ञको टोली घटनास्थल नपुगेसम्म उक्त क्षेत्रलाई सुरक्षित राख्न संखुवासभा प्रहरीलाई प्रदेश प्रहरी कार्यालयले निर्देशन दिएको एसपी राईले जानकारी दिए ।

यो पनि पढ्नुहोस् : एकै परिवारका ६ जनाको हत्या, हत्यामा धारिलो हतियारको प्रयोग