शनिबार, फागुन १२, २०८०

छिन्नमस्ता मन्दिरबाट चोरिएको मुकुटसहित एक पक्राउ

मेरोन्यूज २०७८ साउन १८ गते ११:५२

सप्तरी । छिन्नमस्तास्थित प्रसिद्ध शक्तिपीठ छिन्नमस्ता भगवतीको चोरी भएको मुकुट (मस्तक)सहित एक जना पक्राउ परेका छन् । चोरी भएको चाँदीको मुकुटसहित विष्णुपुर गाउँपालिका ५ मझौका राजेशकुमार मण्डललाई प्रहरीले पक्राउ गरेको हो ।

आइतबार राति करिब ७ बजे सरसफाईका लागि मन्दिरका पुजारी पोखरीबाट पानी लिन गएका बेला मुकुट चोरी भएको थियो । चोरी गरेका मण्डलले बिहान आफैँले मुकुट ल्याएको र मन्दिर स्थापना गर्ने भन्दै गाउँमा हल्ला गर्दै हिँडेको स्थानीयवासी जयप्रकाश यादवले बताए ।

मण्डलको साथबाट ७५० ग्रामको चाँदीको मुकुट, सुनको टीका र नथिया बरामद गरिएको थियो । मण्डललाई अनुसन्धानका लागि जिल्ला प्रहरी कार्यालय ल्याइएको प्रहरी उपरीक्षक राजेन्द्रप्रसाद धमलाले बताए ।

चोरीको घटना बाहिरिएपछि आइतबार राति नै प्रमुख जिल्ला अधिकारी जयनारायण आचार्य, प्रहरी उपरीक्षक धमलासहितको टोली घटनास्थल पुगेका थिए । प्रहरीले तत्काल पुजाको पालोमा रहेका तीन पुजारीलाई नियन्त्रणमा लिएको थियो । चोरीको अनुसन्धानका लागि राति नै सीमानाकामा सिल गरिएको थियो ।

Advertisement

प्रतिक्रिया