शुक्रबार, फागुन १८, २०८०

एमालेले बोलायो स्थायी कमिटी बैठक, माधव नेपाल समूह नजाने

मेरोन्यूज २०७८ साउन १७ गते ६:५९

काठमाडौं । आन्तरिक विवादमा रुमलिएको नेकपा एमालेले पार्टीको आन्तरिक विषयमा छलफल गर्न स्थायी कमिटी बैठक बोलाएको छ ।

ललितपुरको च्यासलस्थित तुलसीलाल स्मृति भवनमा दिउँसो ३ बजे बस्ने बैठकका लागि तीन वटा एजेन्डा तय भएको एमाले केन्द्रीय कार्यालयका सचिव शेरबहादुर तामाङले जानकारी दिए ।

केन्द्रीय विभागहरुलाई पूर्णता दिने, विधान महाधिवेशनको तयारी र पार्टी सदस्यता नविकरण र वितरणको विषयमा छलफल हुने उनको भनाई छ ।

एमालेले यही साउन २५ देखि २७ गतेसम्म विधान महाविधेशन गर्ने निर्णय गरेको छ । यस्तै भदौ १५ गतेभित्र सबै स्थानीय तहको अधिवेशन गर्ने यसअघि निर्णय गरिसकेको छ ।

अध्यक्ष केपी शर्मा ओलीको कार्यशैलीप्रति असन्तुष्टि जनाउँदै आएको झलनाथ खनाल–माधव कुमार नेपाल समूह भने आजको बैठकमा पनि उपस्थित नहुने जनाएको छ । उक्त समूहले यसअघिका बैठक पनि बहिस्कार गर्दै आएको थियो ।

Advertisement

पार्टी एकताका लागि अध्यक्ष ओलीले आफु लचक भएको विभिन्न विकल्पमा छलफल गर्न सकिने बताएपनि खनाल नेपाल समूहले एकपछि अर्को बखेडा झिकिरहेको छ ।

यसअघि हिजोका लागि तय भएको स्थायी कमिटी बैठक आजका लागि सारिएको हो । पार्टीभित्रको विवाद निरुपण गर्न गठित कार्यदलले छलफल भइरहेको जानकारी गराएपछि अध्यक्ष ओलीले बैठक आजका लागि सारेका हुन् ।

प्रतिक्रिया