शनिबार, फागुन १२, २०८०

पार्टी एकता कायम राख्ने एमाले नेता नेपालका तीन विकल्प

मेरोन्यूज २०७८ साउन १३ गते १९:४४

काठमाडौं । नेकपा एमालेका वरिष्ठ नेता माधवकुमार नेपालले पार्टी एकताका लागि विश्वासको वातावरण बन्न् नसकेको बताएका छन् । उनले आफू पार्टी एकताको पक्षमा रहेपनि अध्यक्ष केपी शर्मा ओली संकटमा परेपछि एकताको कुरा गर्ने तर पछि अपमानयुक्त अभिव्यक्ति दिने गरेको बताए ।

बुधबार आफू निकट नेताहरुसँगको छलफलमा नेता नेपालले अध्यक्ष ओलीले अहंकार देखाएर ‘आममाफी’ दिएको बताए । उनले भने, ‘आफू एकताको विपक्षमा छैन । पार्टीमा सबैले सम्मानको अनुभूति गर्ने वातावरण बन्नुपर्छ । अहंकारविरुद्ध अर्धविद्रोह गरेका हौं । पूर्ण विद्रोह भएको छैन । पूर्ण विद्रोह भनेको पार्टी विभाजन हो । एकताको पक्षमा उभिएकाहरु विभाजनमा जानु बाध्यता हो ।’

छलफलमा नेता नेपालले नेतृत्वबारे तीन विकल्प प्रस्ताव गरेका छन् । उनले नेतृत्वबारे छलफल गर्न आफू तयार रहेको जनाएका छन् । उनले दोस्रो अध्यक्ष नभएर समान हैसियतको हुनुपर्ने बताएका छन् । तर, उनले ओलीसँग आफू अध्यक्ष नबन्ने बताएका छन् । उनले दुई अध्यक्षमा सहमति भए वरिष्ठ नेता झलनाथ खनाललाई बनाउनु पर्ने प्रस्ताव गरेका छन् । अर्को विकल्पमा उनले अध्यक्ष मण्डल बनाउने र त्यसमा ओली, खनाल र वामदेव गौतम रहनु पर्ने बताए । तेस्रो विकल्प ओली र आफू दुवैले पदीय जिम्मेवारीबाट बिदा हुनुपर्ने सर्त राखेका छन् ।

तर, कार्यदलमा रहेका नेपाल पक्षका नेताहरुले ओली र नेता नेपाल नभए एकता कायम राख्न नसकिने बताएका थिए ।

Advertisement

प्रतिक्रिया