आइतबार, साउन २९, २०७९

जुवाखालबाट दुई लाखसहित आठ जना पक्राउ

मेरोन्यूज २०७८ साउन १२ गते ८:०९

सुर्खेत । जिल्ला प्रहरी कार्यालय सुर्खेतले जुवाखालबाट दुई लाखसहित आठ जनालाई पक्राउ गरेको छ । एक होटल सञ्चालक र सात जुवाडेलाई प्रहरीले सोमबार बेलुकी ५ः३० बजे पक्राउ गरेको हो ।

वीरेन्द्रनगर नगरपालिका–४ सुर्खेतको जुम्ला रोडस्थित सकुन्तला न्यौपानेले सञ्चालन गरेको सुर्खेती स्टाप होटलमा जुवातास खेलिरहेको अवस्थामा उनीहरू पक्राउ परेका हुन् ।

दैलेख घर भइ वीरेन्द्रनगर बस्ने ३० वर्षीय किरण विष्ट, ३० वर्षीय पदम सलामी मगर, २२ वर्षीय बखत शाही, २८ वर्षीय यामबहादुर रोकाय र ३० वर्षीय लोकबहादुर बुढालाई पक्राउ गरिएको जिल्ला प्रहरी कार्यालय सुर्खेतका सूचना अधिकारी प्रहरी नायब उपरीक्षक घर्तीले जानकारी दिए ।

त्यस्तै सुर्खेतकै ४० वर्षीय बलबहादुर बाह्रघरे, अछामका ३५ वर्षीय जीवन शाहीलाई प्रहरीले पक्राउ गरेको प्रहरी नायब उपरीक्षक घर्तीले बताए ।

होटलमा पैसाको हारजीत हुने गरी जुवातास खेलिरहेको अवस्थामा उनीहरुसहित जुवाखालबाटै दुई लाख १४ हजार ९७० नगद र दस्तखत गरिएका विभिन्न बैंकका ११ थान चेक पनि बरामद गरिएको उनले बताए ।

Advertisement

त्यसैगरी प्रभु बैंकको चार लाख लेखिएको दस्तखतसमेत भएको एक थान चेक, एनएमबि बैंकको ४९ हजार रकम उल्लेख गरी दस्तखत गरिएको एक थान चेकका साथै जुवा खेल्न प्रयोग गरिएको एक गड्डी तास र तास खेल्न बिच्छ्याइएको एक थान लिउ पनि रीतपूर्वक बरामद गरिएको उनले जानकारी दिए ।

जुवाडेसहित होटल सञ्चालक डुङ्गेश्वर गाउँपालिका–५ स्थायी घर भई वीरेन्द्रनगर नगरपालिका–४ सुर्खेत भैरवस्थान बस्ने २६ वर्षीय शकुन्तला न्यौपानेसमेतलाई नियन्त्रणमा लिएर अनुसन्धान भइरहेको जिल्ला प्रहरी कार्यालय सुर्खेतले जनाएको छ ।

प्रतिक्रिया