शनिबार, साउन ९, २०७८

प्रतिबन्धित ‘निलो रेडबुल’ बिक्री गर्ने चार जना पक्राउ

मेरोन्यूज २०७८ साउन ६ गते १४:०६

काठमाडौँ । प्रतिबन्धित क्याफिनयुक्त (इनर्जी ड्रिङ्क्स’ शक्ति बद्र्धक पेय पदार्थ ‘निलो रेडबुल’ बिक्री वितरण गर्ने चार जनालाई पक्राउ गरेको छ । प्रतिबन्धित क्याफिनयुक्त शक्ति बद्र्धक पेय पदार्थ अवैध रुपमा बिक्री वितरण गर्ने काठमाडौं बबरमहल बस्ने प्रणव स्टोर न्यूरोडका सञ्चालक ४४ वर्षीय रविनराज श्रेष्ठ, बाँके कोहलपुर घर भई गोगंबु बस्ने २६ वर्षीय राजु पौडेल, ओखलढुंगा चम्पादेवी घर भई निलोपुल बस्ने ३१ वर्षीय धनबहादुर श्रेष्ठ र सर्लाही हरिपुर घर भएका विरेन्द्र चौधरी लाई पक्राउ गरेको हो ।

Advertisement

पौडेल रेडबुल ओसारपोसारमा संलग्न रहेको र श्रेष्ठ शक्तिमाता स्टोर कपनका सञ्चालक रहेको प्रहरी अनुसन्धानबाट खुलेको छ । पक्राउ परेका मानिसलाई बरामद सामानसहित आवश्यक कारबाहीका लागि भन्सार विभागमा पठाइने महाशाखाले जनाएको छ । ३ असार २०७६ मा प्रकाशित राजपत्र भाग ५ को सूचना १ प्रकरण ४ को (ढ) बमोजिक क्याफिनयुक्त शक्तिबद्र्धक पेय पदार्थ बिक्री वितरणमा पूर्ण बन्देज गरिएको छ ।

काठमाडौंको न्यूरोड, सिनामंगल, पूरानो बानेश्वर, कपन, गोठाटारलगायतका स्थानमा रहेका होलसेल सप्लायर्स तथा मार्टहरुले बाह्य मुलुकमा उत्पादित निलो रेडबुल नेपालमा ल्याई बिक्री वितरण गरिरहेको भन्ने गोप्य सूचनाका आधारमा महानगरीय प्रहरी अपराध महाशाखाको टोलीले ५ साउनमा छापा मारेको थियो ।

उक्त स्थानमा छापा मार्दा प्रतिबन्धित निलो कलरको शक्तिबद्र्धक पेय पदार्थ रेडबुल बिक्री वितरण गरिरहेको अवस्थामा फेला पारी उनीहरूको साथबाट २०२ कार्टुन अर्थात ४ हजार ८ सय ४८ थान बरामद गरिएको महाशाखाका प्रवक्ता तथा प्रहरी उपरीक्षक (एसपी) कृष्ण कोइरालाले बताए ।

एसपी कोइरालाका अनुसार बरामद रेडबुलमध्ये ८४ कार्टुन बा २१ च १२५ नम्बरको टाटा पिकअप भ्यानमा राखेर बिक्री वितरण गरिरहेको अवस्थामा नयाँबस्ती गोठाटारबाट बरामद भएको हो ।

Advertisement

साथै बरामद सामानहरू खुला सीमानाको फाइदा उठाउँदै भारतबाट नेपाल भित्र्याउने र पिकअप भ्यान तथा रात्री कालीन बसबाट काठमाडौँसम्म ल्याउने गरेको अनुसन्धानबाट खुलेको छ ।

प्रतिक्रिया