आइतबार, असोज १०, २०७८

उच्चअदालत सुर्खेतद्वारा ६४ प्रतिशत मुद्दा फर्स्योट

मेरोन्यूज २०७८ साउन ५ गते १०:३१

सुर्खेत । उच्च अदालत सुर्खेतले गत आर्थिक वर्ष २०७७/७८ मा ६४ प्रतिशत मुद्दा फर्स्योट गरेको छ । गत वर्ष दर्ता भएका ७३३ थान मुद्दामध्ये ४६८ अर्थात ६४ प्रतिशत मुद्दा फर्स्योट गरेको उच्च अदालतले जनाएको छ ।

Advertisement

अदालतका अनुसार आर्थिक वर्ष २०७५/७६ मा दर्ता भएका ४७९ थान मुद्दामध्ये ८३.०२ प्रतिशत मुद्दा फर्स्योट भएको थियो । सोही वर्ष ८८ थान मुद्दा आर्थिक वर्ष २०७६/७७ मा सरेका थिए ।

आर्थिक वर्ष २०७६/७७ मा भने ३२१ अर्थात् ५२.२८ प्रतिशत मुद्दा फर्स्योट भएको थियो । बाँकी २९३ मुद्दा भने आर्थिक वर्ष २०७७/७८ मा सरेका थिए । गत आर्थिक वर्षमा मुद्दातर्फ ६६३ र रिटतर्फ ७० गरी ७३३ थान मुद्दा दर्ता थिए ।

अदालतका उपरजिष्ट्रार सरोजनिधि वाग्लेले दुई वर्ष अवधि नाघेका मुद्दाहरु नरहेको जानकारी दिए । दुई सय ६५ थान मुद्दा फर्स्योट गर्न बाँकी रहेको छ ।

अदालतले ज्यानसम्बन्धी मुद्दामा ३२ सहित अघिल्लो वर्षमा सरेका मुद्दासहित ८७ थान, जबर्जस्ती करणीका ६८ दर्ता भएकामा ४५ र सम्बन्धविच्छेदतर्फ १६ मध्ये नौ थान मुद्दा फैसला गरेको छ ।

त्यस्तै एक बन्दी प्रत्यक्षीकरण र अन्य उत्प्रेषण परमादेशलगायत ४९ थान दर्ता भएकामा अघिल्लो आर्थिक वर्ष २१ थान जिम्मेवारी सरी ७० रिटमध्ये ४९ थान फैसला भएको उपरजिष्ट्रार वाग्लेले बताए ।

उच्च अदालतका कायममुकायम मुख्य न्यायाधीश शेषराज शिवाकोटीले मुद्दाहरुलाई समयमै किनारा लगाउन, नागरिकलाई छिटो छरितो र प्रभावकारी सेवा प्रदान गर्न फैसला समयावधिमा विशेष ख्याल गरिएको बताए ।

अदालतप्रतिको जनआस्था अभिवृद्धि गर्न छरितो फैसला नीति लिएको उनको भनाइ छ ।

अर्का न्यायाधीश राजेन्द्र खरेलले अदालतका कामकारवाही जनताले थाहा पाउन जरुरी रहेको भन्दै उच्च अदालतले जनतालाई न्यायिक प्रणालीसँग जोड्न ‘जनतासँग न्यायाधीश कार्यक्रम’ सञ्चालन गरिरहेको बताए ।

प्रतिक्रिया