मंगलबार, जेठ ३, २०७९

२५ दिनपछि गाडिएको अवस्थामा सुजिताको शव फेला

मेरोन्यूज २०७८ असार १३ गते १८:३३

काठमाडौँ । महोत्तरीको लोहारपट्टी नगरपालिका ७ भ्रमरपुरा गाउँमा हत्या गरी गाडिएको अवस्थामा एक महिलाको शव फेला परेको छ । परिवारजनले गत जेठ २० गते बिहान घरबाट हराएको भनिएको स्थानीय मुकेश ठाकुरकी पत्नी सुजिता ठाकुरको शव गाडिएको अवस्थामा फेला परेको हो ।

जिल्ला प्रहरी कार्यालय महोत्तरीका प्रहरी उपरीक्षक दिनेशकुमार आचार्यका अनुसार भ्रमरपुरा गाउँको मनरहीया वनमा रहेको पतिराम ठाकुर (मृतकका ससुरा)को खेतमा गाडिएको अवस्थामा शवका अवशेष फेला परेका हुन् । गत १९ गते राति नै हत्या गरी ससुरा पतिराम, देवर रुपेश र पति मुकेशले उनको शव घरभन्दा करिब ३ किलोमिटर पूर्व दक्षिणमा रहेको मनरहिया वन नजिकको खेतको पश्चिम उत्तर कुनामा गाडिएको प्रहरीले जनाएको छ । आज २५ दिनपछि उनको शवका अवशेषहरू फेला परेको हो ।

मृतकका माइती पक्षले शव उत्खनन् गर्न दबाब दिएपछि प्रहरीले उत्खनन् गर्दा खाल्डोमा मृतकको कपाल, प्लाष्टिकको डोरी, रगत, केमिकल र नुन मिसिएको माटो, तन्ना, महिलाले लगाएको लुगा फेला परेको हो । घटनाको २५ दिनपछि उनको शरीर गलिसकेको र केही अवशेषहरू मात्रै बाँकी रहेको थियो ।

माइती पक्षले सुजिताको हत्या गरी मनरहिया वनमा गाडेकाले उत्खनन गरी जाँच गरिदिन प्रहरीसँग माग गरेका थिए । माइती पक्षले प्रहरीलाई छोरीको हत्या गरेको जानकारी दिए पनि छोरीकै चरित्रमाथि प्रश्न चिह्न गरी सहयोग नगरेको बताएका छन् । सामाजिक अभियन्ता जिल्ला प्रहरी, प्रदेश प्रहरी, प्रदेश नं २ को आन्तरिक मामिला तथा कानूनमन्त्री ज्ञानेन्द्र यादव र मधेशी आयोगको दबाबमा सुजिताको शव उत्खनन भएको उनकी आमा सुनिताले जानकारी दिइन् ।

मृतकका देवर रुपेशले सुजितालाई मारेको स्वीकार गरेको भिडियो सामाजिक सञ्जालमा भाइरल भएको थियो । तर, प्रहरीले उक्त भिडियोलाई प्रमाण मानेको थिएन । अहिले घटनाबारे अनुसन्धान भइरहेको प्रहरीले जनाएको छ ।

Advertisement

प्रतिक्रिया