काठमाडौँ । काठमाडौँको नर्भिक अस्पतालमा उपचाररत मोडल निशा घिमिरेलाई चलचित्रकर्मी कल्याणकारी कोषले आर्थिक सहयोग गर्ने भएको छ ।

चलचित्र विकास बोर्ड अन्तगर्तको कोषले घिमिरेलाई ५१ हजार रुपैयाँ सहयोग गर्ने निर्णय गरेको हो । यस्तै म्युजिक भिडियो कलाकार संघले पनि निशालाई सहयोग गरेको छ । संघका अध्यक्ष शंकर बिसीसहितको टिम नर्भिक अस्पताल पुगेर २० हजार रुपैयाँ निशाका बुबालाई हस्तान्तरण गरेको हो ।

भारतमा दुर्घटनामा परेकी निशाको केही समय उनको भारतमै उपचार भएको थियो । आर्थिक अवस्थाका कारण परिवारले उनलाई नेपाल ल्याएर केही महिना अस्पतालमा उनको उपचार भएको थियो । तर, आर्थिक अवस्थाकै कारण उपचार गर्न गाह्रो भएपछि उनलाई घरमा राखिएको थियो ।

घरमा उनको स्वास्थ्य अवस्था झनझन बिग्रिदै गएपछि गत बिहीबारदेखि निशाको नर्भिक अस्पतालमा उपचार भईरहेको छ । नवजिवन परोपकार संस्था र नर्भिक अस्पतालकी मेघा चौधरीको पहलमा उनको निःशुल्क उपचार सुरु भएको छ । निशाले तीज दर्जन बढी म्युजिक भिडियो, एक भोजपुरी चलचित्र तथा केही टेलिसिरियलमा काम गरेकी थिइन् ।