आइतबार, असार १२, २०७९

पार्टीको निर्णयलाई सुदूरपश्चिम एमाले संसदीय दलको बैठकद्वारा अस्वीकार

मेरोन्यूज २०७८ जेठ १२ गते १३:३०

काठमाडौँ । सुदूरपश्चिम प्रदेशको नेकपा एमाले संसदीय दलको बैठकले तत्काल सरकारको समर्थन फिर्ता नलिने निर्णय गरेको छ । बुधबार बसेको बैठकले माओवादी केन्द्र नेतृत्वको सरकारको समर्थन जारी राख्ने निर्णय गरेको हो ।

गत सोमबार पार्टीको स्थायी कमिटी बैठकले माधव नेपाल, झलनाथ खनालसहित ११ जना विघटित प्रतिनिधिसभा सदस्यलाई पार्टीको साधरण सदस्यसमेत नरहने गरी निष्कासनसहित सुदूरपश्चिम प्रदेशको सरकारलाई दिएको समर्थन फिर्ता लिने निर्णय गरेको थियो । तर, सुदूरपश्चिम एमालेको संसदीय दलको बैठकले स्थायी कमिटीलाई चुनौती दिँदै समर्थन फिर्ता नलिने निर्णय गरेको हो ।

एमाले सुदूरपश्चिम प्रदेश संसदीय दलको आज बसेकाे बैठकले सरकारलाई दिएको समर्थन तत्काल फिर्ता नलिने निर्णय भएको सुदूरपश्चिम प्रदेशका सामाजिक विकास मन्त्री कृष्ण राज सुवेदीले जानकारी गराए । उनका अनुसार अहिले काेराेनाकाे महामारी र बजेट ल्याउने पर्ने अवस्था भएकाले सरकारबाट समर्थन फिर्ता नलिने निर्णय भएको हाे ।

योसँगै सुदूरपश्चिम प्रदेशमा माओवादी नेतृत्वको सरकार जोगिएको छ । सुदूरपश्चिम प्रदेशसभामा एमालेका २५ सांसद छन् । बुधबारको बैठकमा २१ जना सहभागी थिए ।

सुदूरपश्चिम प्रदेशसभामा अहिले ५२ सदस्य छन् । सबभन्दा ठूलो दल एमालेका २५, नेकपा माओवादी केन्द्रका १३, नेपाली कांग्रेसका १२ र जनता समाजवादी पार्टी (जसपा)का २ जना प्रदेशसभा सदस्य छन् ।

प्रतिक्रिया