मंगलबार, कार्तिक ९, २०७८

स्वास्थ्य प्रणालीमा केही समस्या देखिन सक्छन्, तर ‘कोल्याप्स’ भयाे भन्नु भएन नि : प्रधानमन्त्री ओली

केही दिन अघि गंगलाल हृदयराेग केन्द्रका कार्यकारी निर्देशक डा चन्द्रमणि अधिकारीले काेराेना संक्रमण भयावह भएपछि नेपालकाे स्वास्थ्य प्रणाली ‘कोल्याप्स’ भएकाे बताएका थिए ।

मेरोन्यूज २०७८ जेठ १ गते २१:१६
फाइल फाेटाे

काठमाडौं । प्रधानमन्त्री केपी शर्मा ओलीले कोरोना महामारी सबैको साझा समस्या भएकाले नियन्त्रणमा लिन सक्रियताका साथ लाग्नुपर्ने बताएका छन् । प्रधानमन्त्री निवास बालुवाटारमा आज स्वास्थ्य क्षेत्रसँग सम्बन्धित जानकारसँगको छलफलमा उनले कोरानाको समना गर्न सरकार सक्षम रहेको बताए ।

Advertisement

“हामी कोरोना सामाना गर्न सक्षम छौँ, सरकारले थुप्रै विषय कार्यान्वयन गरेको छ, नियन्त्रणका उपाय गर्न तयार र उत्सुक छ, आगामी दिनमा पनि निरन्तर हुन्छ”, उनँले भने, “सरकारका प्रयासमा स्वास्थ्य क्षेत्र, निजी व्यावसायिक क्षेत्र, गैरसरकारी संस्था, गैरआवासीय नेपाली सबैका आआफ्ना ठाउँबाट संगठित प्रयासको खाँचो छ ।”

कोरोना फैलन नदिन सामाजिक दूरी नै अत्यन्त उचित उपाय रहेको भन्दै उनले सरकारले तोकेको स्वास्थ्य मापदण्डको पालनामा सबैले ध्यान दिनुपर्ने बताए । “जनतालाई फेरि पनि सजग गराउन आवश्यक छ । कोरोनाका लागि कुनै पनि तोकिएको औषधि छैन, तर पनि जनतामा यो खाएर निको हुन्छ की भन्ने विश्वास छ, रेम्डिसिभिर नै कोरोनाको औषधि होइन, यसलाई जनतामा बुझाउनुपर्छ”, प्रधानमन्त्री ओलीले भने ।

अक्सिजनको आपूर्ति तथा उपकरणको उपलब्धतामा सबैको जोड हुनुपर्ने बताउँदै उनले अक्सिजन, औषधिलगायत अत्यावश्यक सामग्रीको जोहो गर्न सरकार गम्भीर भएर लाग्ने बताए । कोरोना नियन्त्रणका लागि सञ्चालनमा ल्याइएका हटलाइन नम्बरमा फोन नउठ्ने गुनासा बाहिर आएको भन्दै प्रधानमन्त्रीले हटलाइनमा आएका समस्या समाधान तत्काल गर्न आवश्यक जनशक्तिको व्यवस्था गर्न निर्देशन दिए ।

“त्यहाँ पालो लगाएर मान्छे राख्नुस्, देश भरीको अस्पतालसँग, सुरक्षा निकायका प्रमुखसँग समन्वय हुनुपर्छ, आएको गुनासाको उचित सम्बोधन हुनुपर्छ, धेरै लाइन चालू गर्नुपर्छ”, उनले भने ।

Advertisement

संक्रमितहरु होम आइसोलेसनमा बस्दा समुदायमा संक्रमण फैलिएको हुनसक्ने तर्फ सरकारसचेत रहेको भन्दै होम आइसोलेनसमा बसेका संक्रमितले स्वास्थ्य मापदण्ड पालना गर्नुपर्नेमा जोड दिए । स्वास्थ्य तथा जनसंख्या मन्त्रालयका अनुसार अहिले करिब ९२ प्रतिशत संक्रमित होम आइसोलेनसमा छन् ।

कोरोना संक्रमण बढिरहेका बेला जनतालाई अत्यास लाग्ने अभिव्यक्ति कोही कसैले पनि दिन नहुनेमा जोड दिँदै उनले आमनागरिकको उपचार सरकारले गर्ने प्रष्ट पारे । “हाम्रो स्वास्थ्य प्रणालीमा केही समस्या देखिएका होलान्, तर ‘कोल्याप्स’ भएको छैन’, प्रधानमन्त्रीले भने, “समस्या भए समस्या छन् पो भन्नुपर्यो, कोल्याप्स भयो त भन्नुभएन नि ।”

केही दिन अघि गंगलाल हृदयराेग केन्द्रका कार्यकारी निर्देशक डा चन्द्रमणि अधिकारीले काेराेना संक्रमण भयावह भएपछि नेपालकाे स्वास्थ्य प्रणाली ‘कोल्याप्स’ भएकाे बताएका थिए ।

कोरोना नियन्त्रण गर्न सरकारले केही गरेर भनेर भन्नु मुर्खता भएको टिप्पणी गर्दै उनले एउटा पनि कोरोना परीक्षण गर्ने प्रयोगशाला नभएको मुलुकमा अहिले ८० भन्दा बढी प्रयोगशाला स्थापना भएको बताए । “यसबीचमा नेपालको स्वास्थ्य क्षेत्रमा निकै सुधार भएको छ”, उनले भने, “महामारी पहिल्यै थाहा हुने कुरा भएन, अप्रत्याशित महामारीको सामना गर्नुपर्दा केही समस्या हुन सक्छ ।”

छलफलमा स्वास्थ्य तथा जनसंख्या मन्त्री, सुरक्षा निकायका प्रमुख, विशेषज्ञ चिकित्सक, निजी क्षेत्रका प्रतिनिधिलगायतको उपस्थिति थियो ।

प्रतिक्रिया