शनिबार, साउन २८, २०७९

चीनले दिने २० हजार थान अक्सिजन सिलिण्डर अर्को साता नेपाल आइपुग्ने

चीनले दिने अक्सिजनको सिलिण्डमध्ये २ हजार थान हवाई र १८ हजार थान स्थलमार्गबाट ल्याउने तयारी

मेरोन्यूज २०७८ वैशाख २१ गते १४:१५

काठमाडौँ । नेपाललाई चीनले सहयोग दिने भनिएको २० हजार थान अक्सिजन सिलिण्डर अर्को सातासम्म काठमाडौँ आइपुग्ने भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले चीनले सहयोग गर्ने २० हजार थान अक्सिजन सिलिण्डर अर्को सातासम्ममा नेपाल आइपुग्ने जानकारी दिएका हुन् ।

‘चीनले दिने भनिएको अक्जिसन सिलिण्डर अर्को सातासम्ममा नेपाल आइपुग्ने छ,’ डा. गौतमले भने, ‘हामीले २ हजार हवाईमार्ग र १८ हजार थान सिलिण्डर स्थलमार्गबाट ल्याउने तयारी गरेका छौँ ।”

कोरोना भाइरस संक्रमितलाई अक्सिजन अभाव नहोस् भन्नका लागि नेपालको आग्रहपछि चीनले २० हजार थान अक्सिजन सिलिण्डर सहयोग दिने भएको हो ।

चिनियाँ विदेशमन्त्री वाङ यीले दक्षिण एसियाली मुलुकका विदेशमन्त्रीहरूसँग आयोजना गरेको सामूहिक छलफलका क्रममा नेपाललाई ५० लाख आरएमबी (९ करोड १८ लाख बढी) मूल्य बराबरको स्वास्थ्य सामग्री दिने घोषणा गरेको थियो ।

कोभिड संकट व्यवस्थापन केन्द्र (सिसिएमसी)को शुक्रबारको बैठकमा पनि चीनले सहयोग स्वरुप उपलब्ध गराउने भनेकामध्ये दुई हजार सिलिण्डरलाई जहाजबाट ल्याउनेबारे छलफल गरेको थियो ।

Advertisement

यसैगरी, गत साता नै सरकारले नेपालका अक्सिजन उद्योगका प्रतिनिधिहरूको छलफलपछि २० हजार थान सिलिण्डर खरिद गर्ने र त्यसको सोधभर्ना सरकारले गरिदिने बताएको थियो ।

प्रतिक्रिया