बुधबार, भदौ १, २०७९

‘ओलीविरुद्ध अविश्वासको प्रस्ताव दर्ता गर्न बहुमत छैन, यद्यपि प्रयास जारी छ’

मेरोन्यूज २०७८ वैशाख १७ गते १६:१०

काठमाडौँ । प्रमुख प्रतिपक्षी दल नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीविरुद्ध अविश्वासको प्रस्ताव लैजान बहुमत नपुग्ने बताएका छन् । आज दिउँसो आफ्नै निवासमा कोरोना भाइरस (कोभिड–१९)बारे पार्टीको आधिकारिक धारणा पेश गर्न डाँकिएको पत्रकार सम्मेलनमा उनले यस्तो बताएका हुन् ।

प्रधानमन्त्री ओलीविरुद्ध विपक्षी दलहरु मिलेर अविश्वासको प्रस्ताव लैजाने भन्ने कुरा के हुँदै छ ? भन्ने पत्रकारहरुको प्रश्नमा सभापति देउवाले आफूहरु सबै दल मिले पनि बहुमत नपुगेको बताए । उनले भने, ‘अविश्वासको प्रस्ताव लैजान बहुमत चाहिन्छ कि चाहिँदैन ? बहुमत त चाहिन्छ नि !, अहिलेको अवस्थामा बैकल्पिक सरकार बन्न सक्ने अवस्था छैन, यद्यपि पहल जारी छ ।’

उनले वैकल्पिक सरकार गठनका लागि तत्काल जनता समाजवादी पार्टी (जसपा)ले निर्णय गरेर आउनेमा पनि आफू विश्वस्त नभएको बताए ।

यस्तै, सभापति देउवाले देशमा कोरोना संक्रमण थेग्नै नसक्ने गरी ह्वात्तै बढेको बताएका छन् । ‘अधुरा कामलाई पनि भीडभाड गरी उद्घाटन गर्न सरकारले हतार गरेको हुँदा कोरोना संक्रमण बढेको हो,’ उनले भने, ‘प्रधानमन्त्रीले गर्दा देशमा लकडाउन गर्नु पर्ने अवस्था आयो ।’

Advertisement

प्रतिक्रिया