बिहीबार, चैत १५, २०८०

उदयपुर सिमेन्टका महाप्रबन्धक न्यौपानेको सफलता, १०० दिनमा पछिल्लो छ महिना बराबरको आम्दानी

मेरोन्यूज २०७८ वैशाख ११ गते १९:१६

काठमाडौं । उदयपुर सिमेन्ट प्रालिले पछिल्लो तीन महिनाको अवधिमा रु ४९ करोड आम्दानी गरेको छ । उक्त आम्दानी चालु आर्थिक वर्षको छ महिनाको आम्दानी बराबर हो । उद्योगले चालु आवको साउनदेखि पुस मसान्तसम्म रु ५२ करोड आम्दानी गरेको थियो ।

सो अवधिसम्म उद्योगले छ लाख ९८ हजार ५८६ बोरा सिमेन्ट बिक्री गरेको थियो । गोपी न्यौपानले उद्योगको महाप्रबन्धकको जिम्मेवारी सम्हालेपछिको १०० दिनमा छ लाख ६० हजार १७३ बोरा सिमेन्ट बिक्री भएको हो । चालु आवको साउनदेखि पुससम्मको तुलनामा पछिल्लो १०० दिनमा सिमेन्ट उत्पादन र आम्दानी दुवै वृद्धि भएको उद्योगले जनाएको छ ।

उद्योगले पछिल्लो चार वर्षको बिक्री इतिहास तोड्दै यही वैशाख ६ गते १७ हजार १६४ बोरा सिमेन्ट बिक्री गर्न सफल भएको छ । पुस मसान्तसम्म तत्काल तिर्नुपर्ने दायित्व रु ६६ करोड रहेकामा उद्योबाट नै कमाइ गरी सरकारी राजश्व रु ७ करोड, कर्मचारी सेवा सुविधा भुक्तानी रु ८ करोड, वस्तु आपूर्ति सेवाको भुक्तानी रु ३० करोड, अवकाश कोषमा रु ४ करोड गरी कुल रु ४९ करोड भुक्तानी गरिएको सूचना अधिकारी लक्ष्मणप्रसाद पोखरेलले जानकारी दिए ।

उद्योगले यही अवधिमा नेपाल विद्युत् प्रधिकरणलाई भुक्तानी गर्न नसकेको रु २२ करोड भुक्तानीसमेत गरेको छ । महाप्रबन्धक नियुक्त भएदेखि न्यौपाने उद्योगको रणनीतिक सुधारमा खटिइएका थिए । सन् १९९४ मा जापान सरकारको सहयोगमा उद्योगको स्थापना भएको थियो । २८ वर्षअघि जडान गरिएको प्रविधि बारम्बार बिग्रिरहँदा उद्योगले पटकपटक क्षति व्यहोर्दै आएको थियो ।

उद्योगले पछिल्लो समय भारतबाट विशेषज्ञ ल्याएर मेसिन मर्मत गर्ने गरेको छ । विशेषज्ञले अहोरात्र रुपमा खटिएर ‘ब्रेकडाउन’ कम गर्न सफल भएको उद्योगले जनाएको छ । यो अवधिमा क्लिन शेल, मिल र कोलमिलको रोलर मर्मत गरी सञ्चालनमा ल्याइएको छ । लाइनर, ड्राइफार्मलगायत उपकरण भने नयाँ जडान गरिएको छ ।

Advertisement

उद्योगमा कोइला, जिप्सन, आइरनओरलगायतका इन्धन तथा कच्चा पदार्थको मौज्दात शून्य हुने अवस्था पनि अहिले समाधान भएको छ । न्यौपाने आएलगत्तै यसको व्यवस्थापन गरी माघ १० गतेदेखि नै नियमित रुपमा कारखाना सञ्चालन हुने व्यवस्था मिलाएका छन् । अहिले यार्डमा ५ हजार मेट्रिकटन भन्दा बढी कोइला, एक हजार ५०० मेट्रिकटन भन्दा बढी जिप्सन र १ हजार मेट्रिकटन बढी आइरन ओर मौज्दात रहेको सूचना अधिकारी पोखरेलले बताए ।

उद्योगले एक वर्षभित्र एसपी (सस्पेन्सन प्रिहिटर) सिस्टमबाट आरएसपी (रिइनफोर्स सस्पेन्सन प्रिहिटर) सिस्टममा परिवर्तन गरी प्रतिदिन ३०० मेट्रिकटन क्षमता बढाई ८०० मेट्रिकटनबाट एक हजार १०० मेट्रिकटन सिमेन्ट उत्पादन गर्ने लक्ष्य लिएको छ । एक वर्षभित्र एक मेगावाटको सोलार प्लाण्टबाट विद्युत् उत्पादन गरी विद्युत्को वैकल्पिक स्रोत प्रयोग व्यवस्था मिलाइने उद्योगले जनाएको छ । प्रतिदिन एक हजार १०० मेट्रिकटन उत्पादन गरी सिमेन्ट बिक्रीबाट चार अर्ब आम्दानी हुने उद्योगले प्रक्षेपण गरेको छ ।

उद्योगले अरबौंको क्लिङ्कर आयात प्रतिस्थापन गर्ने, नेपालमा स्थापित अन्य उद्योगलाई कच्चा पदार्थका रुपमा गुणस्तरीय क्लिङ्कर उपलब्ध गराउने, भारतको विहारको नेपाल सीमाक्षेत्रमा निकासीको सम्भावना खोजी गरी निकासी गर्न सकिने जस्ता मुलुकको हितमा हुन सक्ने बहुआयामिक अवसरको उपयोग गर्ने लक्ष्य लिएको सूचना अधिकारी पोखरेलले बताए

प्रतिक्रिया