शनिबार, साउन ९, २०७८

एमालेमा समानान्तर कमिटी विस्तारमा तीव्रता

यी हुन् नेपाल पक्षका १८ जिल्लाका १८ कमाण्डर (सूचीसहित)

मेरोन्यूज २०७७ चैत २२ गते २१:३१

काठमाडौं । नेकपा (एमाले) झलनाथ खनाल-माधव नेपाल पक्षले देशव्यापी समानान्तर कमिटी बनाउने क्रममा आइतबारसम्म १८ जिल्लामा समानान्तर जिल्ला कमिटी बनाएको छ ।

Advertisement

पहिलो चरणमा काठमाडौंसहित गण्डकी प्रदेशका सबै जिल्ला कमिटीहरु बनाइएका छन् । पूर्वमा चार जिल्लामा पनि समानान्तर कमिटी बनाइसकेका छन् ।

प्रधानमन्त्री एवं एमाले अध्यक्ष केपी शर्मा ओलीले गत बिहीबारमात्रै पार्टी सदस्यबाट ६ महिनाका लागि निलम्बन गरेका सुरेन्द्र पाण्डेले गण्डकी प्रदेशको कमाण्ड सम्हाल्दै सबै जिल्लामा समानान्तर जिल्ला कमिटी बनाएका छन् ।

खनाल–नेपालकै उपस्थितिमा आइतबार वसन्त मानन्धरकाे नेतृत्वमा एक सय ६८ सदस्यीय काठमाडौं जिल्ला कमिटीको घोषणा गरिएकाे छ । शुक्रबार र शनिबार कलंकीको मेघा पार्टी प्यालेसमा बसेको माधव नेपाल समूहकाे केन्द्रीय कमिटीको बैठकले गण्डकीमा सुरेन्द्र पाण्डे, प्रदेश १ मा भीम आचार्य, प्रदेश २ मा घनश्याम भुसाल, वागमतीमा अष्टलक्ष्मी शाक्य, लुम्बिनी र कर्णालीमा युवराज ज्ञवाली र सुदूरपश्चिम प्रदेशमा भीम रावल इन्चार्ज तोकेर समानान्तर कमिटी बनाउने निर्णय गरेको थियो ।

त्यही अनुसार एमाले अध्यक्ष ओलीले निलम्बन गरेका नेता पाण्डेलाई गण्डकी प्रदेशको संयोजक बनाइएको छ । कास्कीमा बिहीबार नेता नेपालकै उपस्थितिमा भएको भेलाबाट पाण्डेलाई प्रदेश संयोजक तोकेको छ ।

Advertisement

पाण्डेले २५ सदस्यीय सचिवालयसमेत बनाएका छन् । केन्द्रीय सदस्य दिलु पन्तका अनुसार गण्डकी प्रदेशका सबै जिल्लामा अध्यक्ष र सचिव चयन भइसकेका छन् । उनका अनुसार प्रदेश कमिटीको सहसंयोजकमा तुलबहादुर गुरुङ र श्रीमाया थकाली चयन भएका छन् ।

‘देशभर नै समानान्तर कमिटी बनाउने निर्णय भएको छ त्यही अनुसार गण्डकीका सबै जिल्लामा समानान्तर कमिटी बनेको हो’, केन्द्रीय सदस्य पन्तले भनिन् । हाल गण्डकीमा पार्टीको स्थापनाकालदेखिनै लागेको धेरैजसो नेताहरु माधव नेपाल पक्षमा खुलेर लागेका छन् ।

बिहीबारको भेलाले गण्डकी प्रदेशका सबै जिल्लामा समानान्तर कमिटी गठन गरेको छ । एमालेको बर्चश्व रहेको गण्डकी प्रदेशमा पार्टीमा लामो समय काम गरेका नेताहरु आबद्ध भएकाले पनि सुरेन्द्र पाण्डेलाई संयोजक बनाएर पठाइएको थियो ।

संयोजक तोकिएकै तेस्रो दिन गण्डकीमा प्रदेश कमिटी गठन गरेर उनी शुक्रबार र शनिबार पूर्वको उदयपुर पुगेका थिए । केन्द्रीय सदस्य पन्तका अनुसार कास्कीमा अध्यक्ष धनराज आचार्य र सचिवमा होम नेपाली चयन गरिएको छ ।

स्याङजामा अध्यक्ष रामचन्द्र भट्टराई र सचिवमा भूपराज अधिकारी चयन गरिएको छ । म्याग्दीमा बालकृष्ण सुवेदी, बागलुङमा इन्द्रलाल सापकोटा, पर्वतमा भक्त कुँवर र सचिवमा पदमपाणी शर्मा चयन भएका छन् । शर्मा भने ओली पक्षका नेता आनन्द पोखरेलका छोरी ज्वाई हुन् ।

त्यस्तै तनहुँमा शंकरनारायण श्रेष्ठ अध्यक्ष चयन भएका छन् भने गोरखामा यसअघि उपाध्यक्ष यादव बस्नेतको नेतृत्वमा समिति गठन गरिएको र कार्यालय समेत सञ्चालनमा आइसकेको छ । नवलपुर र लम्जुङमा पनि अध्यक्ष र सचिव चयन भैसकेको केन्द्रीय सदस्य पन्तले बताइन् ।

नेपाल पक्षले यसअघि खोटाङमा बबी चाम्लिङलाई अध्यक्षमा चयन गरिसकेको छ । यसैगरी सर्लाहीमा रेवती पन्त चयन भइसकेका छन् । सर्लाहीमा ओली समूहले पन्तलाई अध्यक्ष अस्वीकार गरिसकेको छ । भोजपुरमा शरण राईलाई संयोजक तोकिएको छ ।

संखुवासभामा हेमराज घिमिरेको नेतृत्वमा जिल्ला कमिटी पुनर्गठन भएको छ । तेह्रथुमको जिल्ला कमिटीमा एक पदाधिकारीबाहेक सबै नेपाल पक्षमै रहेका छन् । त्यस्तै अर्घाखाँचीमा रामबहादुर चौहानलाई संयोजक बनाइएको छ ।

युवा संघमा नरेश शाही, विद्यार्थीमा सुदेश पराजुलीलाई अध्यक्ष बनाइएकाे छ । युवा संघको भने छुट्टै कार्यालय बनाइएको छ । यता काठमाडौं जिल्ला कमिटी अध्यक्ष भएका वसन्त मानन्धरले वडा तहसम्मै कमिटी निर्माण गर्ने बताएका छन् ।

क्र.सजिल्लाअध्यक्ष
१.काठमाडाैंवसन्त मानन्धर
२.खोटाङबबि चाम्लिङ
३.सर्लाहीरेवती पन्त
४.भाेजपुर शरण राई
५.संखुवासभाहेमराज राई
६.अर्घाखाँची रामबहादुर चाैहान
७.तनहुँशंकरनारायण श्रेष्ठ
८.गाेरखायादव बस्नेत
९.स्याङ्जारामचन्द्र भट्टराई
१०.म्याग्दीबालकृष्ण सुवेदी
११.बागलुङइन्द्रलाल सापकाेटा
१२.कास्कीधनराज आचार्य
१३.तेह्रथुम
१४.नवलपुर
१५.लमजुङ
१६.मनाङ
१७.मुस्ताङ
१८.पर्वत
१९.युवा संघनरेश शाही
२०.विद्यार्थीसुदेश पराजुली

प्रतिक्रिया