बाँके । ज्वाला सिंहको नाममा चन्दा रकम माग गरेको अभियोगमा ४ जनालाई नेपालगंज उपमहानगरपालिका–२२ पुरैनीबाट प्रहरीले पक्राउ गरेको छ ।

पक्राउ पर्नेमा राप्तीसोनारी गाउँपालिका–४ सूर्यलालपुर बस्ने २४ वर्षीय विकास चौधरी, सोही गाउँपालिका–५ बस्ने मर्गनाथ भन्ने ४१ वर्षीय मेघनाथ चौधरी, सोही गाउँपालिका–२ बस्ने ४० वर्षीय भीमबहादुर भण्डारी र नेपालगंज उपमहानगरपालिका–३ सल्यानीबाघ बस्ने दाङ तुल्सीपुर उपमहानगरपालिका–१५ घर भएका २९ वर्षीय ज्योती प्रकाश चौधरी छन् ।

राप्तीसोनारी गाँउपालिका–५ जुरपानी बस्ने एक पुरुषसँग विगत १ हप्ता पहिलादेखि ज्वाला सिंह समूहको नामबाट फोन गरी २ लाख रूपैयाँ रकम चन्दा माग गरेको भन्ने सूचनाको आधारमा जिल्ला प्रहरी कार्यालय बाँकेबाट खटिएको प्रहरीले आफूलाई ज्वाला सिंह समूह बताउने उनीहरूलाई चन्दा रकम माग गर्न प्रयोग भएको सिमकार्ड र चन्दा बापतको नगद १० हजार रुपैयाँसहित पक्राउ गरेको हो ।

यस सम्बन्धमा प्रहरीबाट आवश्यक अनुसन्धान भइरहेको जिल्ला प्रहरी कार्यालय बाँकेले जनाएको छ ।